Madinalag-on nga ginhiwat sang National Democratic Front of the Philippines (NDFP) ang ikatatlo nga internasyunal nga kumperensya teoritikal sa Amsterdam, The Netherlands sadtong Nobyembre 29-30. Topiko sang kumperensya ang teorya sang pungsodnon nga kahilwayan halin sa imperyalismo. Gintambungan ang kumperensya sang 114 ka indibidwal nga nagatiglawas sa 57 ka proletaryo-sosyalista nga partido, kahublagan sa pungsodnon nga kahilwayan kag kontra-imperyalista nga organisasyon.
Kon madumduman ginhiwat ang una kag ikaduha nga kumperensya teoritikal sadtong Oktobre 2023 kag Marso 2024 nga nagtalakay sa imperyalistang gyera kag imperyalistang krisis sa ekonomiya. Suno sa NDFP, ginsakop sang ikatatlo nga kumperensya ang mga teoritikal kag praktikal nga kontribusyon nila Lenin, Stalin kag Mao angot sa hambalanon sa pungsodnon nga kahilwayan, lakip ang lain-lain nga mga pamaagi sang paggiit kag pagtib-ong sang kinamatarung sa pagdesisyon sa kaugalingon, lunsay sa armado kag indi armado. Gintutok ang una nga adlaw sang kumperensya sa presentasyon sang mga gin-andam nga kontribusyon. Ginhiwat ang plenaryo sa ikaduha nga adlaw kon diin ginsuma ang mga punto sang mga delegado.
Lakip sa mga topiko nga gintalakay ang kahalitan nga dala sang mga imperyalistang agresyon kag mga gyerang proxy sa kahilwayan kag sobereniya sang mga pungsod. Ginsakop man sang mga talakayan ang nanari-sari nga hambalanon nga gina-atubang sang mga wala pa natapos nga mga kahublagan paghilway, kag ang kinahanglanon nga ipadayon ang pagkonsolida kag pagpangapin sang naagum na nga mga kadalag-an. Isa sa mga nahambalan ang paghimo kag pagpabaskog sang internasyunal nga suporta para sa mga kahublagan nga ini.
Lubos nga ginakalipay sang Partido Komunista sang Pilipinas (PKP) ang pagtalakay sa pungsodnon nga kahilwayan sa ikatatlo nga kumperensya. Nakasulat sa mayor nga artikulo sa pagtipon nga ginsulat sang Komite Sentral sang PKP:”Ang paghimakas sang ginapigos nga pumuluyo sa bug-os nga kalibutan para sa kahilwayan nagaserbe nga isa sa mga krusyal nga elemento sa pangkabug-osan nga estratehiya agud isulong ang internasyunal nga rebolusyonaryong handum sang proletaryo.”
Suno sini, tungod sa pagpamigos sang imperyalismo, nangin mabaskog ang paghandum sang mga pumuluyo sa pungsodnon nga kahilwayan ukon pagdesisyon sa kaugalingon halin sa kolonyalismo. Sa mga pungsod nga ini, nahigot ang dalagko nga burges-kumprador sa kolonyal nga ekonomiya kag nagasunod-sunod sa mga imperyalista, kag mahuyang ang petiburges kag pungsodnon nga burgesya. Sa amo sini, yara sa abaga sang sahing mamumugon ang katungdanan nga bugkoson ang tanan nga ginapigos nga sahi kag sektor kag pamunuan ang pakig-away para sa pungsodnon nga kahilwayan. Sa panahon sang imperyalismo kag proletaryong rebolusyon, nagtuhaw ang bag-o nga tipo sang burges-demokratiko nga rebolusyon nga ginapamunuan sang proletaryo, kag ginasulong bilang pauna nga tikang para sa paglunsar sang sosyalistang rebolusyon kag konstruksyon.
Ang amot sang lain-lain nga tumalambong sa kumperensya nakabulig sa pagpadalum kag pagpamanggad sa talakayn sa hambalanon sang pungsodnon nga kahilwayan. Ginpaambit sang rebolusyonaryong grupo halin sa Cyprus ang papel nga ginatungdan sang ila teritoryo sa imperyalistang mga gyera sa Middle East kag North Africa. Sa subong, ginagamit ini sang lima ka gamhanan sa NATO (Turkey, Greece, US, United Kingdom kag France) bilang base kag lunsaran sang kampanya nga henosidyo sang US kag sang Zionistang Israel sa Palestine, subongman sa pagpalapad sang gyerang agresyon sa Middle East.
Samtang, ginhapag sang mga pwersang komunista sa Turkey kag Kurdistan ang magkaangot nila nga away. Ang kahublagan Turkish bilang kahublagan nga nagapakig-away sa isa ka pungsod nga ginaharian sang mga imperyalistang gahum, samtang ang kahublagan Kurdish nga ginapigos sang kumprador nga estado sang Turkey. Madalum man ang angot sang kahublagan Kurdistan sa Palestine, kon diin una nga naghanas ang ila mga hangaway.
Sa pangkabug-osan, nangin mabunga ang mga talakayan kag nalab-ot ang panibag-o nga lebel sang paghiliusa sa tunga sang mga delegado. Nagpahayag man ang mga Partido kag organisasyon sang ila lubos nga suporta sa kahublagan para sa kahilwayan sa Palestine kag sa mga grupo nga nagatib-ong sini, lakip ang Hamas. Magluwas sang nasambit nga mga pungsod, nagpasa man sang ila matag-kontribusyon kag panglantaw ang mga kaupod halin sa Eritrea, Nepal, Senegal, Italy kag US.
Sa pagtapos sang kumperensya, ginpatigayon ang isa ka ispesyal nga kultural nga palagwaon sadtong Nobyembre 30 bilang paghanduraw sa ika-60 nga anibersaryo sang Kabataang Makabayan kag ang makasaysayan nga papel sini sa pagsulong sang rebolusyonaryong kahublagan pamatan-on sa Pilipinas kag pag-engganyo sang pakig-isa sa rebolusyon Pilipino.
