No mabalin laeng, pinúnguten dagiti kakabagian dagiti biktima ti ubbaw a gera kontra-droga ni Rodrigo Duterte idi simmango isuna ti panangusig iti kongreso. Nakaro iti pungtot dagiti pamilia iti kaswal a panangisakit na kadagiti pimmatay, panangipapilit na nga amin dagiti biktima ti ubbaw a gera kontra-droga ket “dagiti kriminal” ken napeklan nga awan panagbabawi iti pinukaw na a biag. Uray saan da a komportable a makita ken makadua iti kuarto, inanusan da ti presensia ti sigud a presidente tapno iparupa kaniana a nakasagana da nga irupir iti amin a benneg ken ti panawagan da a hustisia.
Maminduan a daras a simmango ni Duterte ti panangusig ti lehislatura. Idi Oktobre 28, inusar na nga entablado ti senado tapno aglaaw ti mano oras nga agarup awan ti mangkonkontra kenkuana. Kadua na dagiti padana nga akusado a senador, perperdien na dagiti nagiwaras ti brutalidad ken kinarukir ti ubbaw a gera kontra-droga. Ginandat na manen nga aramiden daytoy idiay kongreso idi Nobiembre 13. Iti kapada nga hearing, inaklon na ti “ligal ken moral a sungsungbatan” iti ubbaw a gera iti droga. Inpudno na nga “adda” ti death squad idiay Davao idi meyor pay isuna, panangpondo kadagiti operasion dagiti pulis, panangituding ti opisial tapno mangidaulo ti grupo nga ibagbaga da a nangitinnag ti “modelong Davao” ti ekstrahudisial a pammapatay iti intero a pagilian, panangpatay ti 6-7 katao” ken dadduma pay. Ngem idi dinamag isuna maipanggep kadagiti partikular nga kaso, awan ti malagip, mainaganan ken pannakibiang na.
Ti kas panagdildila nga uleg ni Duterte ket insulto saan laeng a kadagiti pamilya dagiti biktima ken dagiti kasango na nga kongresista, uray ti umili. Inallilaw na dagiti umili kadagiti sarita a ligal tapno ilibak ti personal a sungsungbatan. Kinarit na pay ti ICC nga arestaren isuna sakbay a matay ngem apagtallikud na, napalalo ti panangipilit na nga awan ti otoridad ti korte iti pagilian ken saan na a bigbigen daytoy. Iti bangir daytoy, awan panagduadua a napaneknekan nga dagiti pammapatay iti uneg ti gera kontra-droga ket linteg ti rehimen na. Amin a panagsasao na iti kongreso ket mabalin nga usaren ti ICC tapno madusa isuna iti krimen maibusor iti sangkatauan, basar kadagiti abogado.
Panawagan dagiti abogado, dagiti demokratiko a grupo ken grupo ti karbengan-tao, sukimaten dagiti kongresista no nagtaudan ti pondo nga pinanggunguna ni Duterte kadagiti pulis ken death squad ti irakrakurak nga “reward system” wenno sistema a gungguna. Impaganetget da ti panangukag iti panagusar ni Duterte ti iggem na idi a nakadakdakkel a confidential ken intelligence funds. Umanamong da met ti panukala ti maysa a senador nga panangukag kadagiti bank account ti pamilia Duterte tapno makita ti taray ti panangpasuksok dagiti Chinese druglord kadakuada.
Iti nabayag a laban para iti hustisia, saan a namnamaen dagiti pamilia ti biktima a maaddaan ti panawen nga imbestigaan daytoy iti senado ken kongreso. Ngem saludsod da, ita ta umad-adu ti agsalsaludsod, apay nga naulimek ni Ferdinand Marcos Jr ken nakabaybayag sakbay nga ikkan da ti suporta?
Naan-anayen ti ebidensiya tapno ikaso ken usigen ti estado ni Duterte, kunada. Daytoy a rebbengen ket saan laeng a nakasanggir iti pamilia dagiti biktima. Inrupir da met ti panangbigbig ti awtoridad ken imbestigasion ti ICC a nakasagana nga mangiruar ti mandamiento de aresto maibusor ti dati a presidente ken dagiti kakumplot na. Kasapulan nga agsublin iti pagilian ti ICC tapno mapadaras ti proseso, kunada.
Inallukoy dagiti grupo iti kongreso nga imbestigaan ti ginasgasut pay nga ekstrahudisial a pammapatay a bilin ni Duterte maibusor kadagiti unyonista, aktibista ken mangiruprupir ti karbengan-tao. Dagiti pulis ken opisial a karaman iti gera kontra-droga ket isuda met laeng ti karaman kadagitoy. Iti umadani a panaghearing, maisaang dagiti kaso ti pammapatay ti siyam nga aktibista iti Southern Tagalog ti aw-awaganda a “bloody Sunday Massacre.” Kadagiti aldaw ti hearing no sadino ket kangrunaan a mayaaban ni Duterte, nagisayangkat dagiti demokratiko a grupo, karaman ti pamilya dagiti biktima, kadagiti panagtignay tapno ipanawagan ti panangibalud kenkuana.
