Download here: PDF
Panglukat
Naparang a pagilasinan ti panagrimbaw ti imperyalismo a US iti Pilipinas ti naparang a panagsubli dagiti base militar na iti pagilyan kasta met ti awan-sarday ken dumakdakkel a war games iti kadagaan, kabaybayan ken tangatang ti pagilyan. Ad-adda a papairuten daytoy ti kontrol ti imperyalismo a US iti neokolonyal nga estado ti Pilipinas nangruna iti aso-aso nga Armed Forces of the Philippines (AFP).
Tatta a tawen ket maysan a dekada ti Enhanced Defense Cooperation Agreement (EDCA), ti tratado a balbaliw a nangpalubos kadagiti base militar ti US iti pagilyan. Kas ti immuna a saan a patas a katulagan a Military Bases Agreement, winayaan daytoy ti panangitakder ti militar ti US kadagiti base ken pasilidad iti Pilipinas tapno agipwesto kadagiti tropa ken agiyimbak kadagiti armas ken ramit a panggubat.
Iti unos ti 10 tawen a panagraira ti EDCA, saan a bumaba iti siyam a base militar ti intakder ti US a tunggal maysa ket agdadata a mangrabrabngis iti soberanya ti pagilyan. Dagitoy ket pagilasinan a saan a pudno a nawaya ti pagilyan, ken awan ti independyente a pangruar a patakaran daytoy. Awit dagitoy ti inhustisya iti gimong ken didigra. Dagitoy met laeng a base militar ti kadakkelan a pakaisaysayangkatan dagiti ehersisyo iti gubat a mangdaddadael ken mangisagsagmak iti umili a Pilipino.
1) Anya ti EDCA?
Ti EDCA ket maysa a katulagan a pangdepensa iti baet ti gubyerno ti US ken Pilipinas a kasilpo ti Mutual Defense Treaty (MDT) ken PH-US Visiting Forces Agreement (VFA). Pinirmaan daytoy ni dati a Philippine Defense Secretary Voltaire Gazmin ken US Ambassador to the Philippines Philip Goldberg idiay Manila idi Abril 28, 2014. Ti pirmado a tratado ket insagut idi ti rehimen Aquino II ken dati a US Pres. Barack Obama idi bimmisita iti pagilyan.
Ti katulagan ket addaan inisyal a 10 tawen a bileg, nga awtomatiko nga agtuloy nu saan nga ibasura ti anyaman a partido. Ti negosasyon para iti EDCA ket nangrugi idi Agosto 2013 ken dimmalan iti walo a serye ti panangtalantan. Ti immuna a nagan ti katulagan ket Increased Rotational Presence Framework Agreement wenno panangpasansan ti “panagbisita” dagiti tropa nga Amerikano iti sidong ti VFA. Inpagarup ti imperyalismo a US nga akikid ti kasdiay a balangkas isu a pinalawa da pay ti sakupen daytoy tapno ikkan dalan ti mas permanente a presensya dagiti tropa ti US iti pagilyan.
Ti katulagan ket ibilbilang ti Pilipinas ken US kas katulagan a “pang-ehekutibo” ken saan a pormal a tratado. Daytoy ket taktika ti dua a gubyerno tapno iyaw-awan ti pagkasapulan a dumalan ken pasingkedan dagiti senado da.
Iti sidong ti EDCA, mapalubosan ti base militar ti US iti Pilipinas nu sadinno nga agdadata nga awan kontrol ti gubyerno ti pagilyan kadagiti aktibidad dagiti soldado nga Amerikano ditoy.
2) Manon ti “EDCA site” wenno base militar ti US iti Pilipinas?
Nakalanad iti Artikulo III, Seksyon 1 ti katulagan a mabalin nga agiyaramid dagiti pwersa ti US “kadagiti panagsanay; panagakar; panagsuporta ken kanaig nga aktibidad; panagkarga ti gas iti lugan a pangtangatang; panagipondo kadagiti lugan; temporaryo a panangmantinir dagiti lugan, barko ken eroplano; temporaryo nga akomodasyon kadagiti tauhan; komunikasyon; panagideploy ti pwersa ken ramramit; ken dadduma pay nga aktibidad a mapagnumuan dagiti partido. Mabalin met nga agitakder ti US kadagiti pasilidad a kasapulan na para iti panagbalay dagiti tropa ken dagiti armas ken ramramit da.
Iti agdama, adda ti siyam a deklarado nga “EDCA site” wenno base militar ti US iti Pilipinas. Immuna nga inaprubaran ti Mutual Defense Board-Security Engagement Board (MDB-SEB) ti lima a base idi Marso 19, 2016. Kabilang kadagitoy ti Cesar Basa Air Base idiay Floridablanca, Pampanga; Fort Magsaysay Military Reservation idiay Nueva Ecija; Lumbia Airport idiay Cagayan De Oro; Antonio Bautista Airbase idiay Puerto Princesa, Palawan ken Benito Ebuen Air Base idiay Cebu.
Ninayunan ti MDB-SEB dagiti “EDCA site” idi Pebrero 2023 iti nagan ti “panagsagana” iti “pangta ti China.” Dagitoy ket ti Naval Base Camilo Osias idiay Santa Ana, Cagayan; Lal-lo Airport idiay Lal-lo, Cagayan; Camp Melchor Dela Cruz idiay Gamu, Isabela ken Balabac Island idiay Palawan.
Iti kiddaw ti US, mabalin a “pagtulagan” nga aramiden nga “EDCA site” ti aniaman a publiko ken pribado a daga iti pagilyan. Ngarud, ti Pilipinas ket agserbi a maysa a dakkel a base militar ti imperyalismo a US. Ti panangtransporma iti pagilyan kas base militar ket kasilpo dagiti base na iti South Korea ken Japan.
Iti maysa a dekada, inyulat ti gubyerno ti US a dumanon iti $109 milyon ti inlatang ti Department of Defense na para kadagiti proyekto nga imprastruktura kadagiti “EDCA site.” Kadakkelan a gastos ditoy ti nailatang para iti panangpadur-as iti “EDCA site” iti Basa Air Base. Naibukbok ditoy ti nasurok $59 milyon para iti maysa a warehouse, imprastruktura para iti command and control, fuel storage ken aircraft parking.
Para iti 2025, nagilatang met ti rehimen Biden ti $128 milyon para iti plano a 36 a baro a proyekto kadagiti EDCA site. Ti gastos ti imperyalismo a US kadagiti pasilidad wenno istruktura a naitakder ket posible a singiren iti gubyerno ti Pilipinas batay iti “konsultasyon” iti panawen a panawanen daytoy dagiti soldado nga Amerikano, kaniwas iti maibagbaga nga awtomatiko a sanikua daytoyen ti Pilipinas. Nayon pay ditoy ti mismo a gastos ti gubyerno ti Pilipinas usar ti pondo ti umili a Pilipino.
3) Apay nga adda soldado ken armas ti US ruar iti “EDCA site”?
Palpalubosan ti EDCA nga usaren ti US anyaman nga oras dagiti kalsada, eropuerto, sangladan ken dadduma pay a pasilidad a sibilyan, sadinno man iti Pilipinas. Iti Art. III, Sek. 2, nakalanad a “Nu naidawat, tulungan dagiti natudingan nga awtoridad ti Pilipinas ti panangisigurado ti panaglasat wenno temporaryo nga akses dagiti pwersa ti US kadagiti daga a pangpubliko ken dagiti pasilidad (kabilang dagiti kalsada, sangladan ken eropuerto), kabilang dagiti sanikua wenno adda kontrol ti lokal a gubyerno, ken dadduma pay a pangdaga a pasilidad. Maar-aramat tatta ti termino a “temporaryo” tapno palubosan ti panagpaaramat kadagiti pwersa ti US kadagiti lugar nga uray awan iti listaan ti upisyal na “EDCA site.”
Rumrumwar nga adda ti saan a bumaba iti walo pay a saan a deklarado wenno sikreto a base militar ti US iti Pilipinas nu sadinno a nabayag a nakapondo dagiti tropa nga Amerikano ken dagiti armas ken ramit a panggubat na. Ti dadduma ditoy ket adda dagiti naiyulat a naitakder nga imprastruktura para kadagiti soldado nga Amerikano. Iti sumagmamano met a lugar, numanpay awan ti upisyal a panang-aklon nga ar-aramaten ti US ket masansan a makitaan kadagiti tropa nga Amerikano, lugan ti militar ken armas. Iti bileg ti EDCA, ti imperyalista a US ket maik-ikkan ti akses kadagitoy.
Sumagmamano kadagitoy ti sumagannad:
Subic, Zambales
Maysa iti saan nga upisyal nga “EDCA site” ti Subic Bay Freeport (SBF), ti dati a kadakkelan a base militar na iti Asia, nga agserserbi tatta a talyer dagiti barko a panggubat ti US. Masarakan ditoy ti Subic Drydocks Corporation, sibubukel a tagikua ti Cabras Marine Corporation, a mangimatmaton kadagiti pasilidad ti dry docks ti US Navy. Iti Enero-Hulyo 2024, tinarimaan ti SDS ti 30 a barko ti US Navy. Maysa ditoy ti USNS Millinocket a “na-overhaul” idiay Subic manipud Enero 29 agingga Hulyo 31 wenno iti unos ti 183 aldaw. Tinarimaan met daytoy ti ocean surveillance vessel a USNS Victorious iti unos ti 85 aldaw ken ti USS Manchester iti unos ti pito nga aldaw.
Malaksid kadagiti dry dock, tagikua ti Cerberus Capital Management LP ti dadduma pay a pasilidad iti SBF. Daytoy a kumpanya ket nalawa a pagpuonan dagiti kumpanya iti depensa ti US kas ti M1 Support Services para kadagiti eroplano a panggubat ti US Air Force, Navistar Defense, para aramid kadagiti lugan a pangmilitar ken Tier 1 Group a mangsansanay kadagiti mersenaryo.
Ilocos Norte
Ti hedkwarters ti 4th Marine Brigade Landing Team iti Camp Cape Bojeador Military Park idiay Barangay Bobon, Burgos, Ilocos Norte ket kangrunaan nga ar-aramaten ti US kadagiti war games ken imbakan ti armas. Ti hedkwarters ket naitakder iti barangay idi 2022. Sumaksakop daytoy iti 30 ektarya a kadagaan iti igid ti baybay ti barangay ken direkta a nakatannawag iti South China Sea ken Taiwan Strait. Addaan daytoy ti pader nga 800 metro ti kaatiddog, 15 metro a kapuskol ken pundasyon nga uppat a metro kangato ken walo a metro a kauneg. Mapapati a ti hedkwarters ket maar-aramat tapno agespiya iti garaw ti China iti mandar ti imperyalismo a US.
Malaksid ditoy, inaramat ti US ti Laoag City Airport kas refueling station ti US Marine Corps. Iti airport met laeng nga inpusisyon ti US Army Pacific Command ti ground-based missile system a Typhon Mid-Range Capability a naaramat iti Balikatan Exercises 2024. Immuna a naiyanunsyo nga ikkaten daytoy ti US idi Setyembre ngem awan ti palawag nu apay a nagtalinaed daytoy iti silbilyan nga eropuerto. Mano a darasen a nagipablaak ti pakdaar ti China ken Russia iti presensya daytoy a missile system iti Pilipinas, nga umuna ken agmaymaysa iti rehiyon ti Asia.
Cagayan Valley
Nayon iti dua nga “EDCA site” iti Cagayan Valley, agtaltalinaed dagiti tropa nga Amerikano iti adu a pagilyan iti rehiyon.
Idiay Batanes, adda ti intakder ti US nga “Humanitarian Assistance Disaster Response (HADR) warehouse” iti ili ti Itbayat. Ti warehouse ket ponpondoan ti US ken naitakder a katinnulong dagiti soldado ti AFP. Ar-aramaten daytoy ti 3rd Marine Expeditionary Forces ti US ken Joint United States Military Advisory Group para iti “HADR mission” kalpasan ti didigra. Adda met ti detatsment a paggigianan ti US iti Mavulis Island, Itbayat. Kinali da ti aglawlaw ti pyer ti Basco tapno makasanglad ti dadakkel a barko a nabal ti US.
Iti met Cagayan, us-usaren daytoy dagiti pasilidad ti AFP iti Calayan Island, Calayan ken Fuga Island idiay Aparri. Agar-aramat met ti dadduma pay a pasilidad dagiti soldado ti US iti ili ti Lal-lo, ruar ti Lal-lo Airport a maysa nga “EDCA site.”
Aurora
Tuluy-tuloy ti transpormasyon ti sibilyan a pasilidad nga Aurora Pacific Economic Zone and Freeport Authority (APECO) idiay Casiguran, Aurora agturong iti pasilidad para iti militar ti US ken dagiti Amerikano a kumpanya iti armas. Idi 2019, nakitulag ti dati a rehimen Duterte iti US para iti konstruksyon ti maysa a sangladan a pangmilitar idiay Casiguran a pinagparang da nga aramaten ti Philippine Navy. Ti nasao a proyekto (Casiguran Port Construction Project) ket aggatad ti ₱1.3 bilyon.
Kagiddan daytoy, nairaman ti US iti panagpadur-as iti eropuerto nga adda iti uneg ti sona a pang-ekonomya. Idi 2020, naipadamag nga ti US ket interesado iti panagitakder ti maysa a drone base ditoy kas paset ti panagpapigsa ti presensya a militar na iti rehiyon. Naipadamag met ti panagserrek ti Amerikano a kumpanya a Newark tapno ad-adda pay a “padur-asen” ti pagsangladan ken isagana daytoy iti panagserrek dagiti Amerikano a kumpanya ti armas iti Apeco.
Ti panagpadur-as ti sangladan ken eropuerto ket kasilpo ti plano ti US nga aramiden a “logistics hub” ti 1,300-ektarya a sona a pang-ekonomya. Idi Setyembre, pormal a naideklara ti APECO kas “national defense hub” wenno pasilidad a mabalin a pangistayonan kadagiti tropa, ramit-militar, sistema ti komunikasyon ken dadduma pay. Inbaga met ni Sec. Gilbert Teodoro ti Department of National Defense (DND) a plano ti AFP nga agitakder ti kampo militar iti mismo uneg daytoy.
Catanduanes
Idiay Catanduanes, naiyulat ti plano a panagitakder ti base a nabal iti Long Range Navigation wenno Loran Station iti ili ti Bagamanoc. Segun kadagiti residente, sigurado da nga usaren dagiti soldado ti US daytoy kas istasyon dagiti barko ken armas a panggubat. Malaksid iti dangran nga itunda ti mismo a base iti seguridad ti Pilipinas, sigurado a mapadisi dagiti mannalon ken mangngalap nga agbibiag iti lugar a target a pangikabilan ti base a nabal.
Adu met ti maawanan ti pagbiagan nu aramaten dagiti soldado nga Amerikano ken Pilipino dagiti abakaan, kataltalonan, igid ti baybay ken kabaybayan tapno agisayangkat kadagiti war games, ehersisyo a militar ken dadduma pay a panagpasikat.
Marawi City
Idiay Marawi City, ammo dagiti lider iti komunidad ti panagitakder ti maysa a base militar usar ti pondo ti EDCA iti “ground zero,” ngem saan nga ipabpablaak ti gubyerno daytoy iti publiko. Inyulat met dagiti nasao a lider ti balak nga agitakder ti espesyal a sona a pang-ekonomya iti nasao a lugar.
4) Adda kadi kontrol ti Pilipinas kadagiti “EDCA site”?
Awan ti kontrol ti gubyerno ti Pilipinas kadagiti “EDCA site.” Kaniwas iti ibagbaga daytoy iti publiko a dagiti lugar ket agtalinaed iti sidong ti awtoridad ti Pilipinas, inkeddeng ti EDCA nga adda iti turay ti militar ti US ti desisyon a palubosan dagiti upisyal ti gubyerno ti Pilipinas a makastrek da nu daytoy ket umannurot iti “kinatalged iti operasyon ken dagiti rekisito a pangseguridad” (Art. III, Sek. 5).
Malaksid ditoy, ti Pilipinas ket saan a maikkan ti gundaway nga aramaten dagiti pasilidad ken dagiti ramit nga iserrek ti US iti “EDCA site.” Iti Art. IV, Sek. 3, naikeddeng “a dagiti maipwesto a ramit ti US ket para iti eksklusibo nga usar dagiti pwersa ti US.”
Nayon pay, siwayawaya a makastrek-rumwar dagiti armas nukleyar ti US kadagiti base militar. Kaniwas iti maipanpannakkel a probisyon iti EDCA a saan a kabilang dagiti armas nukleyar kadagiti maiserrek nga armas ti US (Art. IV, Sek. 6), awan ti bileg ti gubyerno ti Pilipinas a siguraduen a sursuroten daytoy ti militar ti US. Kinapudno na, iti Art. IV, Sek. 4, nakalanad a dagiti pwersa ken kontraktor ti US ket “maikkan ti saan a malimitaran nga akses kadagiti Nagtulagan a Lugar (agreed locations) iti amin nga usapin kanaig ti panangipakat ken panangibodega kadagiti ramit a pangdepensa, dagiti suplay ken armas.” Iti sidong ti MBA, mapapati a nakaipwesto ti US kadagiti armas nukleyar iti Pilipinas a saan nga ipakpakaammo ti US nu mano ken sadino, ken saan met nga inammo dagiti napalabas nga aso-aso a gubyerno.
Malaksid nga awanan kontrol ti Pilipinas iti base militar ti US, ik-ikkan pay ti EDCA ti espesyal a pribilehiyo ti US ken matrattrato kas maysa a soberano a bileg nga addaan ekstra-teritoryal a karbengan. Iti Art. VII, Sek. 1, nakalanad a mabalin nga aramaten dagiti pwersa ti US ti kuryente, danum ken dadduma pay a yutiliti a ti bayad na ket kas ti masingsingir iti gubyerno ti Pilipinas ken awan ti bayadan da a buwis. Kasta met, iti Art. VII, Sek 2, “ti US ket maik-ikkan ti awtoridad nga agpataray ti bukod na a sistema a telekomunikasyon” ken “ti panagaramat ti radio spectrum ket maited a libre iti US.”
5) Imprastruktura a militar para iti dumakdakkel ken permanente a presensya
Ti EDCA ket napirmaan iti balangkas ti “panagbwelta iti Asia” ti US tapno sebseban ti panagsaknap ti bileg ti karibal na nga imperyalista a China. Iti sidong ti daytoy a “panagbwelta,” inbaw-ing ti US ti 60% dagiti pwersa a nabal iti rehiyon. Ti panagdakkel daytoy a presensya ket nagkasapulan kadagiti sangladan, eropuerto, baraks ken dadduma pay a pasilidad. Ti panagsubli dagiti tropa ti US kadagiti dati a base ken panaglukat kadagiti baro ket paset ti daytoy a “panagbwelta.”
Ti EDCA ket instrumento iti panagsippaw ti aduan ken nabayag a deployment dagiti tropa nga Amerikano iti rehiyon, nga agtaltalinaed iti pagilyan iti linged dagiti war games ken dadduma pay nga aktibidad militar. Nawaya nga maar-aramat dagiti soldado nga Amerikano dagiti pasilidad ti AFP ken dagiti “EDCA site” kadagitoy a panagsanay a pakadangran dagiti Pilipino. Dagitoy nga aktibidad ket ikedkeddeng ti Mutual Defense Board and Security Engagement Board (MDB-SEB).
Idi 2018, inyulat ti MDB-SEB ti panangisayangkat ti 261 a pinagtipon nga aktibidad ti US ken Pilipinas iti pagilyan. Dimmakkel daytoy agturong ti 281 idi 2019, nagbalin a nasurok 300 idi 2020 ken dimmakkel pay idi 2022 a saan a lumbes iti 400 nga aktibidad. Bigla a dimmakkel agturong ti 500 idi 2023 ken mapatta-patta a dakdakkel pay iti 2024.
Nalawag met nga iladladawan ti dumakdakkel a bilang dagiti nakipaset iti Balikatan war games—ti kangrunaan a war games ti US ken Pilipinas iti pagilyan—ti lumawlawa a presensya a militar ti US ken dagiti gangannaet nga alyado na a pagilyan iti Pilipinas. Idi 2014, adda ti agarup 2,500 tropa nga Amerikano a timmabuno iti Balikatan. Dimmakkel daytoy agturong ti 5,000 idi 2016 ken naikeddeng koma ti partisipasyon ti 6,500 soldado nga Amerikano idi 2020 ngem nakanselar ti Balikatan gapu iti pandemya. Uray iti kangitingitan ti pandemya a Covid-19, naituloy ti Balikatan nu sadinno a timmabuno ti limitado a bilang ti tropa nga Amerikano a 225.
Idi 2022, nasurok 5,100 soldado nga Amerikano ti nakipaset iti panagsanay. Nagaramat da ti 50 eroplano a panggubat, uppat a barko a nabal, 10 amphibious craft, uppat nga HIMARS rocket system launchers, ken uppat a Patriot missile systems. Nakipaset met iti pagsasanay ti 40 a tauhan ti Australian Defense Force.
Ti Balikatan 39-24 tatta a tawen ket maibilang a kadakkelan iti pakasaritaan a nakipasetan ti agarup 16,000 a soldado. Kabilang ditoy ti 11,000 soldado nga Amerikano ken 5,000 tropa a Pilipino ken dagiti soldado ti Australia ken France. Simrek met iti pagilyan dagiti upisyal militar a mangibagi ti 14 pay a gangannaet a pagilyan tapno makipaset ken agpaliiw.
Iti umuna a gundaway, inpan ti US ti Balikatan iti ruar ti teritoryo a baybay ti Pilipinas, kadwa ti pwersa a nabal ti France. Sakbay daytoy, insayangkat ti US ti “istorikal” a maniobra a pangbaybay kadwa ti Pilipinas, Australia ken Japan. “Istorikal” met daytoy naipakat iti pagilyan ken iti Asia a baro a Typhon Missile System (TMS), a bukbuklen ti uppat a missile launcher nga addaan kapasidad nga agpatayab ti misayl iti kaadayo a 1,600 kilometro.
Nagiyaramid met ti US kadagiti baro a war games iti napalabas a dekada kabilang ti Cope Thunder ken Maritime Cooperative Activity (MCA) iti West Philippine Sea. Dua a serye met ti war games pangtangatang a Cope Thunder ti insayangkat ti US, maysa idi Abril ken maysa idi Hulyo.
Dagiti mayor a war games ti Enero-Agosto 2024
Manipud Enero agingga Agosto tatta a tawen, gistay tunggal dua nga aldaw ket adda ti maisaysayangkat a war games dagiti pwersa a militar ti US iti kadagaan, tangatang ken kabaybayan ti Pilipinas. Kadwa da dagiti kaalyado a pwersa a militar ken dagiti tau-tauhan daytoy nga Armed Forces of the Philippines (AFP). Naimaldit dagitoy a war games iti uneg ti saan a bumaba iti 105 iti 244 araw, nu sadinno a kabayagan ken awan-ressat manipud Abril 7 agingga Hunyo 21 (76 aldaw). Iti kabuklan, timmabuno kadagitoy ti saan a bumaba iti 21,000 tropa nga Amerikano, dagiti soldado nga Australian, Canadian, Japanese, French ken dadduma pay a gangannaet a tropa.
Saan a manmano ti gundaway nga aggigiddan ti dua aginga tallo a war games iti pagilyan. Babaen kadagitoy, permanenten nga aggigigian dagiti tropa nga Amerikano iti pagilyan.
Sakbay ken kalpasan dagiti war games, agsusumbangir a pulong, panagsagana ken inspeksyon ti isaysayangkat dagiti gangannaet nga upisyal militar iti lugar dagiti aktibidad. Iti walo a bulan, agarup 20 nangangato a klase ti pulong ti inyaramid dagiti upisyal militar ti US iti AFP, Department of National Defense ken Malacañang.
6) Panagsupyat ti umili a Pilipino iti EDCA
Manipud idi napirmaan ti EDCA, agsusumbangir ti ganetget dagiti makabayan ken demokratiko nga organisasyon tapno labanan ken ipabasura ti katulagan. Manipud kadagiti ligal a laban, demonstrasyon ken internasyunal a kampanya, agtultuloy agingga iti agdama ti panagtakder ti umili a Pilipino laban iti EDCA.
Awan pay ti makabulan kalpasan a napirmaan ti katulagan, nagiyuli kadagiti Korte Suprema dagiti makabayan a dati a senador a da Rene Saguisag ken Wigberto Tañada kadwa dagiti lider ti Bagong Alyansang Makabayan (Bayan) ken dadduma pay a progresibo idi Mayo 26, 2014 tapno babalawen ti kina-konstitusyunal ti EDCA. Da Senador Tañada ken Saguisag, ken 10 pay a senador, ket nagbotos idi 1991 tapno padisien ti base militar ti US iti Subic Naval Base idiay Zambales ken Clark Air Base idiay Pampanga. Adda pay dadduma a petisyon a naiyuli iti Korte Suprema laban iti EDCA.
Iti desisyon idi Enero 12, 2016, indeklara ti Korte Suprema a konstitusyunal ti EDCA. Nagbalin a pinal ti desisyon idi Hulyo 26, 2016 kasaruno ti pannakaabak ti motion for reconsideration iti immuna a desisyon ti korte.
Iti laksid daytoy a pannakapaay, nagtuloy dagiti tignay protesta ken aktibidad iti panangiyuna dagiti grupo a nailyan-demokratiko laban iti EDCA, iti VFA ken dadduma pay a saan a patas a katulagan militar ti US iti Pilipinas.
Kabilang ditoy ti panangbabalaw dagiti mangngalap iti war games iti kabaybayan a mangituntunda ti pannakadiskaril ti pagbiagan da gapu iti panangipataw ti “fishing ban.” Iti Ilocos, nagirakurak ti danag ti lokal a gubyerno iti panagaramat iti lugar da nga awan ti pakada para iti Balikatan. Inreklamo met dagiti residente ti pannakairaman da iti war games kas para bagkat kadagiti kampay idi a masugatan nga Amerikano.
Kaudian kadagitoy a ganetget ti panangisayangkat ti Bayan-USA ken Pilipinong Nagkakaisa para sa Soberanya (P1NAS) a peace mission iti Central Luzon, Ilocos Norte ken Marawi City tapno imbestigaran dagiti “EDCA site” ken dagiti nakaisayangkatan ti Balikatan 2024.
Kabilang kadagiti natakwatan ti delegasyon ti panagigabsuon ti US ti maatap a ramit-militar iti ruar dagiti naikeddeng nga “EDCA site” ken pananggundaway dagiti soldado nga Amerikano kadagiti rekurso ti masa a Cagayanon; panagkukumplot dagiti pribado a kumpanya ken militar; kinaawan ti pakaammo kadagiti komunidad iti Ilocos ken Cagayan nu sadinno a naisayangkat ti Balikatan a nagresulta iti troma ken riribuk iti sibilyan a populasyon ken militarisasyon, panaglipit ken red-tagging kadagiti komunidad a mangsalsalaknib laeng iti pagbiagan da. Idiay Marawi City, naibingay dagiti lokal nga upisyal ti disimpormasyon kanaig iti maitaktakder a base militar ken “economic zone” asideg iti “ground zero” usar ti pondo ti EDCA.
Ibasura ti EDCA!
Dupraken dagiti base militar ti US iti Pilipinas!
_______
Insagana ti:
Kawanihan sa Impormasyon
Partido Komunista ng Pilipinas
Nobyembre 2024