Wala-tuo ang pagbatikos sa pungsodnon nga badyet nga ginkasugtan sang komite nga bicameral sang Senado kag Kongreso sadtong una nga semana sang Disyembre. Sa pinal nga bersyon sini, ginbuhinan sang komite ang pondo para sa sandigan nga mga serbisyong pangkatilingban kag ginbalhin sa mga programa nga bulugasan sang mga proyekto nga imprastraktura kag ayuda para sa sistema nga padrino.
Sa kabilugan, nagpasulod ang komite sang ₱860.5 bilyon sa 2025 badyet kon sa diin ₱487.5 bilyon ang pagbalhin sang pondo (realignment) kag ₱373 bilyon ang “unprogrammed funds.”
Pinakamaathag sa ginhimo nga “realignment” ang pagbalik sang komite nga bicameral sang pondo para sa Ayuda sa Kapos sa Kita Program ukon AKAP nga ginproponer sang pamunuan sang manubo nga Kapulungan pero ginkakas sa bersyon sang Senado. Nagtigana ang komite sang ₱26 bilyon para sa nasambit nga programa, masobra katunga sang orihinal nga kantidad nga ₱39 bilyon. Kon tunga-tungaon, ₱83 milyon ang makadto sa kada kongresista, kag ₱208 milyon naman kada senador. Kon indi pagsakupon ang mga tiglawas sa sistema nga party-list, kada isa ka tiglawas nga may distrito ang maga-uyat sang ₱103 milyon. Para bug-uson ang pondo, ginbuhinan ang badyet para sa mga departamento sang pamugon kag social work.
Palusot sang mga burukrata, target sang AKAP nga hatagan sang ayuda ang mga pamilya nga manubo ang kita nga apektado sang mataas nga tantos sang implasyon. Dugang ini sa tuman ka damo na nga programang ayuda pareho sang Pantawid Pamilyang Pilipino Program ukon 4Ps, Assistance to Individuals in Crisis Situation, TUPAD kag iban pa nga madugay na nga ginagamit sang mga pulitiko para magpalapad sang impluwensya kag pangbakal boto sa mga eleksyon.
Mas dako sa AKAP, gindugangan sang komite ang pondo para sa Department of Public Works and Highways sang ₱288.65 bilyon, nga nagpahabok sa badyet sang departamento padulong sa ₱1.11 trilyon. Ini ang pinakadako nga alokasyon sang departamento sa kasaysayan sini, kag pinakadako sa bilog nga badyet.
Ginpataasan man sang mga burukrata ang unprogrammed funds ukon pondo nga wala pa sang depinido nga kuluhaan nga paga-uyatan kag pagadumalahan sang upisina sang presidente. Halin sa orihinal nga ₱158.7 bilyon, nagpasulod sang dugang nga ₱373 bilyon ang komite, nga nagpadako sang pondo padulong sa masobra tunga sa trilyon. Sa aktwal, ang pondo nga ini ang “pork barrel” sang presidente nga ginabulubanta pagagamiton sang iya kahimbon para siguraduhon ang katampad sang mga burukrata sa palaabuton nga eleksyon.
Para baklon ang katampad sang militar, ginpasakaan sang komite ang inadlaw nga alawans (magluwas pa ini sa sweldo) sang mga soldado halin sa ₱150/adlaw padulong sa ₱350/adlaw ukon sa pangkabilugan nga alawans nga ₱10,500/bulan. Wala kapareho nga dugang-alokasyon para sa iban pa nga mga empleyado sang gobyerno. Ginapabilin man sang bicam ang alokasyon para sa NTF-Elcac nga ₱4.5 bilyon.
Sa pihak nga bahin, ginbuhinan sang ₱12 bilyon ang pondo sang DepEd. Ginbuhinan man sini sang ₱25.80 bilyon ang daan na nga magamay nga pondo sang DoH, kag sang ₱26.91 bilyon ang sa Commission on Higher Education. Ang badyet para sa University of the Philippines ang ginbuhinan sang kabilugan nga ₱2.93 bilyon, pinakadako nga buhin sa halos isa ka dekada.
Ginbuhinan man ang pondo para sa agrikultura sang ₱43.2 bilyon (₱20 bilyon sa departamento sa agrikultura kag ₱23.2 bilyon sa National Irrigation Administration).
Samtang, wala sang may ginbilin bisan isa ka sentimo ang komite para sa Philhealth nga una na gintigan-an sang Kongreso sang ₱74.43 bilyon. Epektibo sini nga ginkuhaan sang subsidyo ang mga pasyente nga wala sa ikasarang nga magbayad para sa pagpa-ospital kag bilog ini nga ginpapas-an sa pumuluyo. Ginpatingkad sini ang papel sang Philhealth bilang pribado nga ahensya nga direkta ginagastuhan sang mga suhol kag sweldo sang ordinaryo nga mga mamumugon kag empleyado, kag ang pagtalikod sang estado sa responsibilidad sini sa serbisyo pang-ikaayong-lawas.
Wala na ginbalik ang sobra ukon kulang ₱500 milyon nga ginbuhin sa upisina sang bise presidente sa pihak sang pagtilaw sang mga alyado ni Sara Duterte nga ibalik ini. Wala man ini sa gihapon ginhatagan sang confidential and intelligence funds (CIF) samtang ginpabilin ang higante nga CIF para sa upisina ni Ferdinand Marcos Jr.
