Kabahin sang isa ka engrande nga kampanya nga disimpormasyon kag saywar ang asud-asod nga deklarasyon nga “insurgency-free” sang nagligad nga mga semana sang mga upisyal ni Marcos kag sang Armed Forces of the Philippines (AFP). Katuyuan sini nga magtuga sang peke nga laragway nga napapas ukon mapapas na ang armado nga pagpakig-away sang pumuluyong Pilipino kag wala na sang kusog nga magpangapin batuk sa mga pasista kag mapanghimulos nga nagaharing sahi.

Tuman ka dako nga tinonto ang ginapadayaw sang AFP nga “isa ka mahuyang nga larangan gerilya” na lang ang ginahulagan sang Bagong Hukbong Bayan (BHB). Wala-unod ang pasulit-sulit sini nga ginatikal nga sa “eksternal nga pamahog” na ini magatutok sang atensyon. Ginahimutig mismo sang AFP ang kaugalingon sini nga mga pulong sa ginapatigayon sini nga wala-puas nga dalagkuan nga opensiba sa tanan nga pamusod sang pungsod. Binilyon ka piso ang gina-usikan subong sang AFP sa adlaw-adlaw nga pagpalupad sang mga helikopter, pagpanghulog sang mga bomba, pagpalupok sang kanyon, pagpakaon kag pagpasweldo sa linibo ka mga tropa sini, sa wala pulos nga pagtinguha sini nga bungkagon ang yunit gerilya sang BHB. Ang plano sini nga “integrated territorial defense system” nga lapnagon nga pagrekrut sang mga CAFGU ang padayon nga nakatutok sa militarisasyon sang mga baryo kag komunidad.

Ginapatalang sang mga deklarasyon nga ini ang publiko kag ginatabunan ang paghari sang laye militar ni Marcos sa kabukiran. Samtang ginahambal nga “wala na sang BHB,” puluan ka libo ka tropa pa sini ang sa gihapon yara sa kabukiran sa mga batalyon nga nagapondo sa mga larangan gerilya kag nakapwesto sa pila ka libo ka detatsment sa mga baryo kag komunidad nga nagasabwag sang kahadlok kag terorismo batuk sa pumuluyo.

Sa pihak sang mga deklarasyon pangpropaganda sini, nagaluntad ang laye militar sa mga interyor nga barangay sa Ilocos Norte, Abra, Kalinga, Cagayan, Isabela, Bulacan, Aurora, Laguna, Quezon, Rizal, Oriental Mindoro, Occidental Mindoro, Camarines Norte, Albay, Sorsogon, Masbate, Capiz, Aklan, Iloilo, Negros Occidental, Negros Oriental, Northern Samar, Eastern Samar, Samar, Surigao del Sur, Surigao del Norte, Agusan del Sur, Agusan del Norte, Bukidnon, Davao del Norte, Lanao del Norte, Saranggani, South Cotabato, kag iban pa nga prubinsya.

Ang paghari militar kag gyera nga pagpanumpo sa kabukiran ni Marcos kag sang AFP ang may kinaiya sang patarasak nga pagpanglapak sa mga demokratiko nga kinamatarung kag paglapas sa mga internasyunal nga makitawhanon nga laye. Naga-unod ini sang okupasyon sang mga pwersa militar kag paghamlet sa pila ka libo ka barangay sa kabukiran, pagbutang sang mga tsekpoynt kag pagpa-logbook, pagdumili sa mga mangunguma nga mag-obra sa uma, pagpapanaog sang karpyu, paglimita sa pagbakal sang bugas kag pagkaon, pagkontrol sa komersyo kag iban pa nga tikang nga naga-ipit sa hulag sang mga tawo.

Tagalumapaw na ang kaakig sang pumuluyo sa mga soldado nga nagahari-harian kag nagakontrol sa ila nga mga baryo. Masami nga ang mga pasista nga soldado nga ini ang nagapanguna sa paggamit sang druga, pornograpiya kag prostitusyon, kag nangin malain nga impluwensya sa mga pamatan-on sa mga komunidad. Permi ang bilog nga gab-i nga imnanay sang mga soldado kag patarasak nga pagpinalupok sang mga pusil kon mahubog. Imbolbado man ang mga soldado sang AFP sa nagadamo nga insidente sang pagpang-abuso kag pagpanglugos sa mga kababainhan, pati na pagpangaluyag ukon pakigrelasyon sa mga may bana.

Pwersahan ang rekrutment para sa paramilitary nga CAFGU, pagpagiya sa mga sibilyan sa mga operasyon pangkombat, pwersahan nga ginapa-obra kag pagpang-ulipon sang mga soldado sa tagabaryo para serbisyohan ang ila nga mga detatsment pareho sang pagpang-kudal, pagkuha sang panggatong, pagpanag-ob sang tubig pang-paligo kag iban pa.

Wala untat ang pagpangbalay-balay, pagharas, “pagpatawag sa kampo” sa mga mangunguma sa tabon sang “paglimpyo sang ngalan” ukon “pagpasurender.” Padayon nga nagadamo ang mga kaso sang pag-abdak kag ekstra-hudisyal nga pagpamatay, mga masaker, indi makatarunganon nga pagpang-aresto, pagtortyur sa mga sibilyan, kag iban pa. Ginapwesto ang mga kanyon nga howitzer malapit sa mga pamalay. Ang mga bomba nga ginapanghulog halin sa kahawaan ang ginatuon malapit sa mga komunidad kag mga uma nga nagabutang sa peligro sa kabuhi kag nagaguba sa propyedad kag palangabuhian sang mga sibilyan.

Katuyuan sang mga deklarasyon nga “insurgency-free” kag pagpapanaog sang laye militar agud gub-on ang kaisog sang pumuluyo nga magbato kag pangapinan ang ila nga mga kinamatarung kag palangabuhian. Pinakatuyo sang paghari-harian sang militar sa mga baryo kag komunidad amo ang serbisyuhan ang amo nila nga mga agalon mayduta kag mga burgesya kumprador sa pagpang-agaw sang duta kag pagpalayas sa mga mangunguma kag mga tumandok nga pumuluyo, kag paghatag-ligwa sa mga mapangwasak nga operasyon sang pagmina, mga plantasyon kag mga proyekto pang-imprastraktura.

Minilyon ang naga-antus sa tanan nga sahi sang pagpamigos sa idalom sang gyerang pagpanumpo sang rehimen Marcos. Dugang pa, naga-antus man sila sa grabe nga pagpabaya ni Marcos sa kaayuhan sang minilyon nga nakaluwas sa mga kasan-o lang nga kalamidad. Labi pa sila nga maga-antus sa masunod nga tuig tungod sa mga pagbuhin sang badyet sa ikaayong-lawas kag edukasyon, kag pagpataas sang badyet para sa pasismo (upod na ang dugang nga badyet para sa mga soldado kag NTF-Elcac) kag korapsyon (dala na ang tuman ka dako nga badyet para sa DPWH kag mga maanomaliya nga proyekto pang-imprastraktura ni Marcos).

Ang tuman nga pagpamigos, pagpang-ipit kag pagpaantus sa masang Pilipino sang rehimen US-Marcos ang mas nagapabakod sa ila nga determinasyon nga maghimakas agud pangapinan ang ila nga mga kinamatarung kag ipakigbato ang ila ginahandum nga katarungan, matuod nga demokrasya kag kahilwayan. Sa pagsabwag sang terorismo batuk sa masang mangunguma kag mga tumandok, ginatudlo ni Marcos sa ila nga wala sang pinaka-epektibo nga pamaagi sang pagbato kundi ang mag-uyat sang armas kag mag-upod sa Bagong Hukbong Bayan.

Sa atubang sang nagabaskog nga pagpamigos kag pagpaantus, determinado ang masang Pilipino upod ang BHB nga labi nga pasingkion ang inaway banwa. Determinado sila nga isulong ang armadong pakig-away kag maglunsar sang mga taktikal nga opensiba, ilabi na batuk sa pinakaginakangil-aran nga tropa nga pasista nga responsable sa mga ektra-hudisyal nga pagpamatay, mga masaker kag tanan nga sahi sang terorismo. Sa sini nga pamaagi, katimbang ang pagsulong sang malapad nga paghimakas masa nga kontra-pasista kag kontra-pyudal, lubos nga mapangapinan ang pumuluyo kag masabat ang ila nagabaskog nga panawagan para sa katarungan kag pagtapos sa laye militar sa ila nga mga lugar.

Kadungan sa pagdumdom sa nagahilapit nga anibersaryo sang Partido, pabakuron naton ang aton desisyon nga ipalapnag ang kalayo sang armado nga pagpakig-away agud sunugon ang pasista nga paghari kag pasagrabon ang pangmalawigon nga inaway banwa. Angkon ang indi matay-og nga espirito sang paghimakas kag determinasyon nga makig-away, pat-ud nga indi mawasak, kundi labi pa nga magasulong ang rebolusyonaryong armadong pakig-away.