Subling gimantala sa rebolusyonaryong kalihukan sa Camarines Norte ang mantalaang Alipato isip instrumento sa buluhaton sa propaganda ug pag-organisa sa mga yunit sa Bagong Hukbong Bayan (BHB) sa prubinsya. Nakahukom ang Komite sa Partido sa prubinsya nga ibalik ang pagmantala sa rebolusyonaryong mantalaan sa masa niadtong Hunyo 2024.
Resulta kini sa dugang paningkamot sa Komite aron dut-an ang mga lokal nga isyu sa ekonomiya ug pulitika, mga pakigbisog sa masa, ug ibutyag ang kabangis ug pasismo sa mga yunit sa 16th ug 81st IB sa masang CamNorteño. Sumala sa Komite, kinahanglan gamiton ang daghang pamaagi, alang sa pag-abante sa gubat sa katawhan.
Sumala sa editoryal board sa Alipato, diha-diha dayon silang nagsugod sa proseso sa pagmugna sa dyaryo human ang desisyon nga subli kining imantala. Milungtad lamang og halos duha ka semana ang pagsulat sa mga artikulo, pagpangalap og koresponsal ug pagtibuok sa mantalaan. Nahimo nila kini sa kahimtang sa gerilyang paglihok sulod sa yunit sa BHB nga ilang gilangkuban.
Adunay 10 ka bahin ang isyu sa Hunyo. Gihatagag duut sa Alipato sa editoryal ang panawagan niini sa masang CamNorteño nga tapuson ang kalisud ug mosalmot sa gubat sa katawhan. Kini adunay balita sa mga aksyong militar sa mga yunit sa BHB-Camarines Norte, mga kaso sa paglapas sa tawhanong katungod sa armadong pwersa sa rehimeng Marcos, pagtinabangay sa masa ug hukbo ug uban pang isyung katilingbanon. Naglangkob usab kini og mga seksyon sa tambag medikal, tribya ug puzzle.
“Kauban sa pagbalik sa Alipato mao ang subling pagplastar sa makinarya sa reproduksyon ug distribusyon sa lokal,” saysay sa mga kauban kabahin sa sistema sa pagpanghatag sa mantalaan. Sumala nila, una nilang gitarget nga mahatagan og usa ka kopya ang tanang mga myembro sa Partido sa lokalidad ug sunod, bisan ang mga myembro sa mga organisasyong masa sa matag barangay.
Kadungan sa pagbalik sa pagmantala sa Alipato, gipaninguha usab sa yunit sa propaganda sa prubinsya nga palig-onon ang ilang presensya sa social media aron ikapakaylap ang mga artikulo niini sa internet. Gikan sa ilang naunang kasinatian, gipaambit sa mga kauban nga relatibong nakatabang ang social media sa pagpukaw sa interes sa masa sa mga dapit nga wala pa maabot sa mga armadong yunit.
Una nga gimantala ang Alipato niadtong 1988 isip resulta sa sunod-sunod nga kampanya kontra-pyudal. Gimantala sa mga pahina niini ang organisadong panaghiusa sa mga mag-uuma ug hukbo atubangan sa nagkagrabeng pyudal nga paghari sa mga agalong yutaan sa prubinsya kakunsaba ang mga lokal nga upisyal sa gubyerno niadtong dekada 1980.
Sa mga pahina niini gibalita ang pagsaulog sa masang CamNorteño sa pagsilot sa BHB sa mga despotikong agalong yutaan sa prubinsya. Gimantala usab dinhi ang sugilanon sa ispontanyong pagsukol sa mga mag-uuma ug katawhan batok sa langyaw nga pagmina niadtong 1981.
Sa misunod nga mga dekada, nahimong nag-unang tigmantala ang Alipato sa mga kadaugan sa rebolusyonaryong kalihukan sa prubinsya nga nahimong inspirasyon alang sa pagpalig-on pa sa diwa ug determinasyon sa masa nga mosukol ug makigbisog. Nahimong kaabag usab sa mantalaan sa larangan sa gimbuhatong propaganda ang regular nga pagmantala sa Tilamsik ng Dakilang Apoy, ang rebolusyonaryong mantalaan pangkultura sa Camarines Norte.
Sa kasamtangan, plano sa yunit nga imantala ang isyu sa Alipato matag kwarto sa tuig. Gawas niini, nagplano usab silang magpagula og mga espesyal nga isyu kung gikinahanglan. “Ang Alipato abli sa padayon nga pagpalambo ug komentaryo. Among gilauman…nga makatabang kini sa [kinatibuk-ang buluhaton sa propaganda],” pamahayag sa editorial board.
Dugang ang Alipato sa daghang rebolusyonaryong mantalaan sa masa gikan sa ang-ang larangan, prubinsya, rehiyon ug nasudnon nga gimantala sa Partido, sa mga yunit sa BHB, ug mga kaalyadong organisasyon sa National Democratic Front of the Philippines. Kini nagsilbing materyal alang sa pagpalig-on sa rebolusyonaryong kalihukan sa asamang bahin sa nasud.
