Sa subling paglingkod ni Donald Trump sa imperyalistang trono isip ika-47 nga presidente sa United States, dala niya ang hulga sa mas dagkung gubat sa nagkalain-laing bahin sa kalibutan, dungan sa labaw pang pagtiurok sa krisis sa panginabuhian sa katawhang Amerikano ug ang nagkakusog nga paggamit sa reaksyunaryong estado sa US og pasismo.
Sa iyang unang termino gikan 2016 hangtud 2020, nabantog si Trump sa iyang mga palisiya ug lakang nga ultra-Too, rasista, pasista, kontra-demokratiko, kontra-imigrasyon, kontra-kababaihan, kontra-LGBT ug ultra-nasyunalista. Nakabalik siya sa poder sa miaging eleksyon human sa upat ka tuig nga paghari sa partidong Democrat. Grabe ang pagkadismaya sa katawhang Amerikano sa nagpadayong krisis sa ekonomiya ug ang nagkadakung kalayo sa mga gerang gisugnuran sa US.
Sama sa miagi, gisakyan ni Trump ang mga reklamo sa ordinaryong katawhan sa nagkataas nga presyo, ubos nga suhulan, ug kahakog sa ganansya sa dagkung korporasyon. Apan sa katapusan, gisugnuran niya ang kasuko sa “kriminal” nga imigrasyon ug mga minorya nga “nangilog og trabaho,” nga nagaguba sa “kinaiyang Amerikano,” bisan sa mga palaboy, mga nagadroga, ug mga nagaprotesta. Ginaduso sa mga upisyal ug kaalyado ni Trump ang Project 2025, usa ka malukpanong reaksyunaryong programa nga magpahamtang og daghang deportasyon, pagwagtang sa Department of Education ug uban pang ahensya sa gubyerno, pagkunhod sa buwis alang sa mga korporasyon, ug pagdili sa katungod sa kababayen-an alang sa aborsyon ug uban pa.
Gipahalap ni Trump ang ugat sa krisis sa kapitalistang sistema sa US aron itago ang kamatuoran nga siya nagrepresentar lamang sa interes sa mga monopolyo kapitalista nga nagpakatagbaw sa mga insentibo, pagkunhod sa buwis, ug gihatag nga subsidyo gikan sa bulsa sa mga Amerikano. Sa iyang unang termino, nakahakop og super-ganansya ang dagkung korporasyong Amerikano sa pinansya, komersyo, lana, pagmugna og sakyanan, armas, tambal, elektronikong kagamitan ug uban pa.
Nagpakaaron-ingnon si Trump nga “higala sa Russia” ug nagsulting “pagatapuson sa usa ka adlaw” ang gubat sa Ukraine. Apan ang tinuod, siya mismo ang nagduso nga pakusgon ang ayudang militar kaniadto alang sa Ukraine, aron ition ang mga misayl ug uban pang armas sa US sa Russia. Ilalum ni Trump, iyang gipahamtang ang ekonomikanhong pagpamig-ot batok sa Russia. Siya usab ang kanhing mipakli sa kasabutan sa US ug Russia nga naglimita sa gidaghanon ug gikusgon sa mga armas nukleyar, aron gawasnon ang US nga subling ibwelo ang produksyon sa mga armas.
Bakak ang mga pamahayag ni Trump nga gusto niyang “tapuson na ang kabangis” sa Gaza ug Lebanon, ang tinuod, hingpit niyang gisuportahan ang Zionistang Israel ug armadong pagpuntirya sa Iran. Niadtong 2018, gimando niya ug personal nga gipasiugdahan ang pagbalhin sa embahada sa US sa Jerusalem, syudad nga ginapanghingusog sa mga Palestino nga kapitolyo sa ilang nasud. Ang planong ibutang ni Trump nga kalihim sa relasyong panggawas usa ka lunod-patay nga Zionista ug kontra-Iran.
Sa pagbalik ni Trump sa poder, gilauman ang mas daku pang tensyon tali sa US ug China. Saad ni Trump nga patas-on hangtud tulo ka pilo ang taripa sa mga ginaimport nga mga produkto gikan China (nga miusbaw og kapin duha ka pilo sukad 2020) ug hingpit nga paghunong sa pag-import dinhi sa 2028. “Kusog nga balos” ang hulga ni Trump batok sa mga nasud nga “namintaha” sa pamatigayon sa US. Kini usa ka direktang hulga sa China ug nagpataas sa posibilidad sa direktang armadong komprontasyon. Kahinumduman nga ilalum ni Trump, unang gitukod ang Operation Pacific Eagle-Philippines nga nakapukos sa pagpakusog sa presensya sa mga tropang Amerikano sa Pilipinas, inubanan sa palisiyang “pivot to Asia” sa US.
Ang mga deklarasyon ni Trump nga pagasiguraduhon niyang ang pwersang militar sa US ang “pinakakusgan ug pinakamakapatay” subay sa duso sa US nga hulhugan, paypayan o direktang mosalmot sa mga guban sa lain-laing bahin sa kalibutan. Desperado ang US nga labaw pang palapdon ang langkub sa imperyo niini, nga hinay-hinay nga nahugno taliwala sa walay kasulbarang krisis sa kalibutanong kapitalistang sistema. Laraw sa US nga kontrolon o ilugon sa iyang mga karibal ang mga merkado ug tinubdan sa lana, mahinungdanong mineral ug uban pang rekurso nga kinahanglan sa produksyon. Nakapukos karon ang US sa mga gubat sa Eastern Europe ug Middle East, ug makanunayong ginapainit ang sitwasyon sa Asia pinaagi sa pagpakusog sa presensya niini sa South China Sea ug Pacific Ocean, ug ginasulsulan ang mga alyado niini sa NATO ug Japan nga pakusgon ang presensyang nabal sa mga maang mga kadagatan.
Sa kasamtangan, ang imperyalismong US ang nag-unang hinungdan sa hulga sa pag-ulbo sa mas dagkung gubat sa lain-laing bahin sa kalibutan. Labaw nga nagkagrabe ang pagpangdaugdaug niini sa mga katawhan nga nagtinguha og nasudnong kalingkawasan, ang pagpamig-ot ug interbensyon niini sa mga nasud nga nanalipud sa ilang kaugalingnan, ug ang pagpanghulhog niini og gubat aron paludhon ang mga imperyalistang karibal niini ug ituboy ang kaugalingon isip nag-inusarang superpower sa tibuok kalibutan. Kining maong mga kontradiksyong siguradong mograbe pa sa mga umalabot nga tuig sa pagduso ni Trump sa hegemonya sa imperyalistang US.
Angayan lamang nga maghiusa ang mga katawhan sa tibuok kalibutan, uban sa katawhang Amerikano, sa usa ka nagkahiusang prente batok sa imperyalismong US ug sa mga pabug-at nga palisiya niini sa ekonomiya ug pamatigayon, sa interbensyon ug agresyong militar ug sa pagpanghagit niini og gubat sa lain-laing bahin sa kalibutan.
Sa partikular, kinahanglang militanteng suklan sa katawhang Pilipino ang imperyalismong US ug ang paggamit niini sa Pilipinas isip dakung base militar ug lunsaranan og gubat. Kinahanglang kusganong suklan sa katawhan ang pagpanghulhog niini og armadong kagubot sa South China Sea ug ang pagguyod sa Pilipinas sa pagsungogsungog niini sa China. Kinahanglang hingpit nga ibutyag ug batukan ang papet nga rehimeng Marcos sa pagpakaitoy niini sa imperyalismong US.
Labaw pa sa nahipatik sa kasaysayan, kinahanglan karong hugpungon ang lapad nga katawhang Pilipino ug sagubangon ang tanang natad sa pagsukol aron kab-uton ang nasudnon ug katilingbanong kagawasan.
