Gisugat og protesta sa mga mamumuo ang pag-abli balik sa kongreso niadtong Nobyembre 4 aron iduso ang pagbalaod sa dugang sweldo sa nasudnong ang-ang. Matud nila, dili makasugakod ang sinsilyong gihatag sa mga regional wage board taliwala sa pagsaka sa tantos sa implasyon ug pagtiurok sa panginabuhi sa mga mamumuo. Labing ulahi dinhi ang mumhong ₱40 nga dugang sweldo sa mga mamumuo sa Western Visayas nga sumala nila, dili igo aron makapalit og bisan usa ka kilong bugas.
Kauban sa padayon nga pagkahagba sa ilang panginabuhi, nag-atubang usab ang mga mamumuo sa iligal ug arbitraryong pagpanangtang ug uban pang paglapas sa mga katungod sa pamuo.
Usa niini ang sunud-sunod nga pagpanangtang ug pagkamatay sa mga mamumuo sa Herma Shipyard sa Mariveles, Bataan sa miaging mga bulan. Dili moubos sa 50 ka mamumuo ang gitangtang niadtong Agosto lakip ang mga nagtrabaho sa pabrika sulod sa duha hangtud 25 ka tuig. Niadtong Setyembre, duha ka mamumuo ang namatay samtang nagtrabaho tungod sa dili luwas nga mga kundisyon sa pabrika.
Sa ABS-CBN, dakung network sa telebisyon, mga 100 ka mamumuo ang anaa sa peligro nga mawad-an og trabaho tungod sa pagkunhod kuno sa kita gikan sa mga adbertisment sa network. Gipanag-iyahan ang kumpanya sa pamilyang Lopez, usa sa pinakadakung burgesya-kumprador sa nasud.
Sa Davao del Sur, 3,200 ang kalit ug arbitraryong gitangtang sa Franklin Baker Inc niadtong Oktubre 3. Gipahibalo sa kumpanya ang pagpanangtang pinaagi lang sa mensahe sa usa ka Facebook group. Hangtud karon, dili klaro sa mga mamumuo ang ilang istatus.
Sa Quezon City, naglunsad og welga ang mga drayber ug konduktor sa Mark Eve’s Transit atubangan sa paradahan niini sa P. Tuazon Boulevard, Barangay Project 4 niadtong Nobyembre 5. Kini aron batukan ang pagpanangtang sa lima ka upisyal sa ilang unyon. Gitangtang ang maong mga mamumuo human midumili ang unyon sa plano sa maneydsment nga kini ang magtudlo sa kung kinsa ang mahimong mga upisyal sa ilang unyon.
Dugang kini nga mga mamumuo sa gitangtang nga 800 ka empleyado sa Ninoy Aquino International Airport ug kapin sa 300 ka mamumuo sa Mactan Export Processing Zone niadtong Setyembre.
Samtang, gitanyagan lang og ₱10,000 nga separation pay ang gitangtang nga mga mamumuo sa AC Mojares Construction bisan upat hangtud 19 ka tuig na silang nagtrabaho sa kumpanya. Daku usab ang wala gibayad nga sweldo kanila alang sa overtime pay, holiday pay, rest day pay, ug night shift differential. Nagprotesta ang gitangtang nga mga mamumuo atubangan sa kumpanya sa Quezon City niadtong Oktubre 29, aron iduso ang paghatag sa angay kanila.
