Download here: PDF
Ang paghibalik sa mga base militar sa imperyalismong US sa Pilipinas usa ka dayag nga timailhan sa pagdomina niini sa nasud, uban ang walay hunong ug nagkadakung mga war games sa kayutaan, kadagatan, ug kahanginan sa nasud. Labaw kining nagpalig-on sa kontrol sa imperyalismong US sa neokolonyal nga estado sa Pilipinas ilabina sa papet nga Armed Forces of the Philippines (AFP).
Usa ka dekada na karong tuiga ang Enhanced Defense Cooperation Agreement (EDCA), ang kasabutan nga subling nagpahibalik sa mga base militar sa US sa nasud. Sama sa naunang Military Bases Agreement, gihatagan niini og kagawasan ang militar sa US nga magtukod og mga base ug pasilidad sa Pilipinas aron magdeploy og mga tropa ug magbutang og mga armas ug himang iggugubat.
Sulod sa 10 ka tuig nga pagtunhay sa EDCA, dili moubos sa siyam ka base militar ang gitukod sa US, nga direktang nagalapas sa soberanya sa nasud. Kini timailhan nga dili tinuod nga gawasnon ang nasud ug wala kini kaugalingong palisiyang panggawas. Ang mga base militar nagdala usab og katilingbanong inhustisya ug kadaut. Kini usab ang pinakadakung lunsaranan sa mga war games nga nagdala og kadaut ug peligro sa mga Pilipino.
1) Unsa ang EDCA?
Ang EDCA usa ka kasabutan sa depensa tali sa gubyerno sa US ug Pilipinas nga kasumpay sa Mutual Defense Treaty (MDT) ug PH-US Visiting Forces Agreement (VFA). Gipirmahan kini ni kanhi Philippine Defense Secretary Voltaire Gazmin ug US Ambassador sa Pilipinas Philip Goldberg sa Maynila niadtong Abril 28, 2014. Giregalo sa kanhing rehimen ni Aquino II ang pirmadong tratado kang kanhi US Pres. Barack Obama sa iyang pagbisita sa nasud.
Ang kasabutan adunay inisyal nga 10 ka tuig nga epektibidad, nga awtomatikong magpadayon kung dili kini ibasura sa duha ka lambigit nga estado. Nagsugod ang negosasyon alang sa EDCA niadtong Agosto 2013 ug miagi kini sa walo ka serye sa pagdungog. Ang unang pangalan sa kasabutan mao ang Increased Rotational Presence Framework Agreement o ang pagpasubsub sa “pagbisita” sa mga tropang Amerikano ilalum sa VFA. Giisip sa imperyalismong US nga limitado ang maong kasabutan maong gipalapad kini aron hatagag dalan ang mas permanenteng presensya sa mga tropa niini sa nasud.
Ang kasabutan giila sa Pilipinas ug US nga “ehekutibong kasabutan” ug dili usa ka pormal nga tratado. Taktika kini sa duha ka gubyerno aron likayan ang panginahanglan nga moagi ug ratipikahan sa tagsa-tagsa nilang senado.
Ilalum sa EDCA, gitugutan ang mga base militar sa US sa Pilipinas kung asa walay kontrol ang gubyerno sa nasud sa mga aktibidad sa mga sundalong Amerikano dinhi.
2) Pila na ang “EDCA site” o base militar sa US sa Pilipinas?
Subay sa Artikulo III, Seksyon 1 sa kasabutan, ginasulti nga ang mga pwersa sa US pwedeng maghimo og “mga pagbansay; pagbalhin; suporta ug mga kalambigit nga aktibidad; pagkarga og gasolina sa mga sakyanang pangkahanginan; pagpondo sa mga sakyanan; temporaryong pagmentinar sa mga sakyanan, barko ug eroplano; temporaryong akomodasyon sa mga personel; komunikasyon; pag-deploy sa pwersa ug kagamitan; ug uban pang aktibidad nga gikauyunan sa mga Partido.” Mahimo usab magtukod ang US og mga pasilidad nga gikinahanglan niini para kapuy-an sa mga tropa ug han-ukanan sa ilang mga armas ug kagamitan.
Sa pagkakaron, adunay siyam ka deklaradong “EDCA site” o base militar sa US sa Pilipinas. Unang gi-aprubahan sa Mutual Defense Board-Security Engagement Board (MDB-SEB) ang lima ka base niadtong Marso 19, 2016. Lakip niini ang Cesar Basa Air Base sa Floridablanca, Pampanga; Fort Magsaysay Military Reservation sa Nueva Ecija; Lumbia Airport sa Cagayan De Oro; Antonio Bautista Airbase sa Puerto Princesa, Palawan; ug Benito Ebuen Air Base sa Cebu.
Gidugangan sa MDB-SEB ang mga “EDCA site” niadtong Pebrero 2023 alang sa “pagpangandam” batok sa “hulga sa China.” Kini mao ang Naval Base Camilo Osias sa Santa Ana, Cagayan; Lal-lo Airport sa Lal-lo, Cagayan; Camp Melchor Dela Cruz sa Gamu, Isabela; ug Balabac Island sa Palawan.
Sa hangyo sa US, mahimong “uyunan” nga himoong “EDCA site” ang bisan unsang pangpubliko ug pribadong kayutaan sa nasud. Busa, magsilbing usa ka dakung base militar alang sa imperyalismong US ang Pilipinas. Ang pagtransporma sa nasud ngadto sa base militar nakasumpay sa mga base niini sa South Korea ug Japan.
Sulod sa usa ka dekada, gitaho sa gubyerno sa US nga miabot na og $109 milyon ang gigahin sa Department of Defense niini alang sa mga proyektong imprastruktura sa mga “EDCA site.” Ang pinakadakung gasto niini gigahin sa pagpalambo sa “EDCA site” sa Basa Air Base. Miabot kini og kapin $59 milyon alang sa usa ka warehouse, imprastruktura para sa command and control, storage alang sa gasolina ug parkinganan sa eroplano.
Alang sa 2025, naggahin usab ang rehimen ni Biden og $128 milyon para sa planong 36 ka bag-ong proyekto alang sa EDCA sites. Ang gasto gikan sa imperyalismong US alang sa mga pasilidad o istruktura nga gitukod posibleng singilon sa gubyerno sa Pilipinas subay sa “konsultasyon” sa higayon nga biyaan na kini sa mga sundalong Amerikano sukwahi sa ginaingong awtomatikong panag-iyahan kini sa Pilipinas. Dugang pa dinhi ang gasto mismo gikan sa gubyerno sa Pilipinas gamit ang pondo sa katawhang Pilipino.
3) Nganong adunay mga sundalo ug armas sa US gawas sa “EDCA site”?
Ginatugutan sa EDCA ang US nga gamiton bisan kanus-a ang mga kalsada, tugpahanan, ug dungguanan ug uban pang mga sibilyang pasilidad sa Pilipinas. Sa Art. III, Sek. 2, ginasulti nga “Kung gihangyo, pagatabangan sa mga gipiling awtoridad sa Pilipinas ang pagsiguro sa pag-agi o temporaryong akses sa mga pwersa sa US sa mga yutang pangpubliko ug mga pasilidad (apil ang mga kalsada, dungguanan, ug tugpahanan), lakip na ang mga gipanag-iya o kontrolado sa lokal nga gubyerno, ug uban pang yuta ug pasilidad.” Gigamit karon ang termino nga “temporaryo” aron tugutan ang paggamit sa mga pwersang US sa mga lugar nga bisan wala sa listahan sa upisyal nga “EDCA site.”
Adunay nagatunhay nga dili moubos sa walo pa ka dili deklarado o sikretong base militar sa US sa Pilipinas diin tagdugay nga nakapondo ang mga tropang Amerikano ug ang ilang armas ug himang iggugubat. Sa taho, ang uban niini adunay gitukod nga mga imprastruktura alang sa mga sundalong Amerikano. Sa pipila ka lugar, bisan walay upisyal nga pag-angkon nga ginagamit sa US, kanunay kining adunay presensya sa mga tropang Amerikano, sakyanang militar, ug armas. Nahatagan og akses ang imperyalistang US dinhi pinaagi sa EDCA.
Ang pipila niini mao ang mosunod:
Subic, Zambales
Usa sa dili upisyal nga “EDCA site” ang Subic Bay Freeport (SBF), ang kanhing pinakadakung base militar niini sa Asia, nga nagsilbi karong talyer alang sa mga barkong iggugubat sa US. Nahimutang dinhi ang Subic Drydocks Corporation, hingpit nga gipanag-iyahan sa Cabras Marine Corporation, nga nagadumala sa mga pasilidad sa dry docks sa US Navy. Sa Enero-Hulyo 2024, giayo sa SDS ang 30 ka barko sa US Navy. Usa niini ang USNS Millinocket nga gi-overhaul sa Subic gikan Enero 29 hangtud Hulyo 31 o sulod sa 183 ka adlaw. Giayo usab niini ang ocean surveillance vessel nga USNS Victorious sulod sa 85 ka adlaw ug ang USS Manchester sulod sa pito ka adlaw.
Gawas sa mga dry dock, gipanag-iyahan sa Cerberus Capital Management LP ang uban pang pasilidad sa SBF. Ang maong kumpanya usa ka dakung tigpamuhunan sa mga kumpanya sa depensa sa US sama sa M1 Support Services para sa mga eroplanong iggugubat sa US Air Force, Navistar Defense, tighimo og mga sakyanang iggugubat, ug Tier 1 Group nga tigbansay og mga mersenaryo.
Ilocos Norte
Ang hedkwarters sa 4th Marine Brigade Landing Team sa Camp Cape Bojeador Military Park sa Barangay Bobon, Burgos, Ilocos Norte ang nag-unang ginagamit sa US sa mga war games ug han-ukanan og armas. Ang hedkwarters gitukod sa barangay niadtong 2022. Gilangkuban niini sa 30 ektaryang kayutaan sa baybayon sa barangay ug nag-atubang sa South China Sea ug Taiwan Strait. Kini adunay pader nga 800 metro ang gitas-on, 15 metro ang gibag-on, ug pundasyon nga upat ka metro pataas ug walo ka metro pailalum. Gituohan nga ginagamit ang hedkwarters aron subaybayan ang lihok sa China sa mando sa imperyalismong US.
Gawas niini, gigamit sa US ang Laoag City Airport isip refueling station para sa US Marine Corps. Sa maong airport usab gimuntar sa US Army Pacific Command ang ground-based nga missile system nga Typhon Mid-Range Capability nga gigamit sa Balikatan Exercises 2024. Unang gi-anunsyo nga tangtangon kini sa US niadtong Setyembre apan walay klarong rason nga gipabilin kini sa sibilyang tugpahanan. Pipila ka beses nang nagpahimangno ang China ug Russia bahin sa presensya niini nga missile system sa Pilipinas, nga una ug nag-inusara sa rehiyon sa Asia.
Cagayan Valley
Dugang pa sa duha ka “EDCA site” sa Cagayan Valley, nagapondo ang mga tropang Amerikano sa mga lungsod sa rehiyon.
Sa Batanes, adunay gitukod nga “Humanitarian Assistance Disaster Response (HADR) warehouse” ang US sa lungsod sa Itbayat. Ang warehouse gipondohan sa US ug gitukod uban ang mga sundalo sa AFP. Gigamit kini sa 3rd Marine Expeditionary Forces sa US ug Joint United States Military Advisory Group para sa “HADR mission” human sa kalamidad. Adunay detatsment usab nga gitambayan sa US sa Mavulis Island, Itbayat. Gikalot ang palibot sa pier sa Basco aron makaduggo ang dagkung barkong nabal sa US.
Sa Cagayan, gigamit niini ang mga pasilidad sa AFP sa Calayan Island, Calayan ug Fuga Island sa Aparri. Nagagamit usab og lain pang mga pasilidad ang mga sundalo sa US sa lungsod sa Lal-lo, gawas pa sa Lal-lo Airport nga usa ka “EDCA site.”
Aurora
Padayon ang pagtransporma sa sibilyang pasilidad nga Aurora Pacific Economic Zone and Freeport Authority (APECO) sa Casiguran, Aurora ngadto sa pasilidad para sa militar sa US ug mga Amerikanong kumpanya sa armas. Niadtong 2019, nakigsabot ang kanhing rehimen ni Duterte sa US alang sa konstruksyon sa usa ka dungguanan pangmilitar sa Casiguran nga kuno pagagamiton sa Philippine Navy. Ang maong proyekto (Casiguran Port Construction Project) nagkantidad og ₱1.3 bilyon.
Dungan niini, nalambigit ang US sa pagpalambo sa airport nga anaa sulod sa sonang pang-ekonomiya. Niadtong 2020, nabalita nga interesado ang US sa pagtukod og drone base dinhi isip kabahin sa pagpalig-on sa presensyang militar niini sa rehiyon. Napabalita usab ang pagsulod sa Amerikanong kumpanyang Newark aron labaw pang “palambuon” ang dungguanan ug iandam kini sa pagsulod sa mga Amerikanong kumpanya sa armas sa APECO.
Kasumpay ang pagpalambo sa dungguanan ug tugpahanan sa plano sa US nga himuong “logistics hub” ang 1,300-ektaryang sonang pang-ekonomiya. Niadtong Setyembre, pormal nga gideklara ang APECO isip “national defense hub” o pasilidad nga mahimong kabutangan sa mga tropa, gamit-militar, sistema sa komunikasyon, ug uban pa. Gisulti usab ni Sec. Gilbert Teodoro sa Department of National Defense (DND) nga plano sa AFP nga magtukod og kampo militar mismo sulod niini.
Catanduanes
Sa Catanduanes, nataho ang plano nga pagtukod og baseng nabal sa Long Range Navigation o Loran Station sa lungsod sa Bagamanoc. Sumala sa mga residente, sigurado silang gamiton kini sa mga sundalo sa US isip usa ka hedkwarters alang sa mga barko ug armas iggugubat. Gawas pa sa kadaut nga dala niini sa seguridad sa Pilipinas, sigurado usab nga mapalayas ang mga mag-uuma ug mangingisdang nagpuyo sa lugar nga target tukuran og base.
Daghan usab ang mawad-an og panginabuhian kung gamiton sa mga sundalong Amerikano ug Pilipino ang mga abakahan, umahan, baybayon, ug dagat alang sa paglunsad og mga war games, aktibidad militar, ug uban pang pagpakitang-gilas.
Marawi City
Sa Marawi City, sayod ang mga lider sa komunidad sa pagtukod og usa ka base militar gamit ang pondo sa EDCA sa “ground zero,” apan wala kini gipahibalo sa gubyerno. Gitaho usab sa mga lider nga adunay planong magtukod og espesyal nga sonang pang-ekonomiya sa maong lugar.
4) Aduna bay kontrol ang Pilipinas sa mga “EDCA site”?
Walay kontrol ang gubyerno sa Pilipinas sa mga “EDCA site.” Sukwahi sa ginaingon niini sa publiko nga magpabilin kini ilalum sa awtoridad sa Pilipinas, gitakda sa EDCA nga anaa sa gahum sa militar sa US ang pagbuot kung tugutan ba nila ang mga upisyal sa gubyerno sa Pilipinas nga makasulod kung kini uyon sa “seguridad pang-operasyon ug mga rekisitong pangseguridad” (Art. III, Sek. 5).
Gawas niini, dili hatagan og oportunidad ang Pilipinas nga gamiton ang mga pasilidad ug kagamitan nga ginapasulod sa US sa “EDCA site.” Sa Art. IV, Sek. 3, ginasulti nga “ang mga ipwestong kahimanan sa US para lamang sa eksklusibong gamit sa mga pwersa sa US.”
Dugang pa, libre nga makagawas-sulod ang US og mga armas nukleyar sa mga base militar. Sukwahi sa gipanghinambog nga probisyon sa EDCA nga nagdumili armas nukleyar (Art. IV, Sek. 6), walay gahum ang gubyerno sa Pilipinas aron masiguro nga gisunod kini sa militar sa US. Sa tinuod, sa Art. IV, Sek. 4, ginasulti nga ang mga pwersa ug kontraktor sa US “hatagan sa walay kinutubang akses sa mga Giuyunang Lugar alang sa tanang hisgutanan nga adunay kalabutan sa pagutang ug paghan-uk sa mga himang pangdepensa, suplay ug armas.” Ilalum sa MBA, gituohang nakamuntar ang US og mga armas nukleyar sa Pilipinas nga wala gipahibalo kung pila ug asa kini, ug wala usab kini giusisa sa mga milabayng papet nga gubyerno.
Wala na gani kontrol ang Pilipinas sa base militar, ginahatagan pa og espesyal nga pribilehiyo ang US pinaagi sa EDCA ug ginatagad kini nga daw usa ka soberanong gahum nga adunay ekstra-teritoryal nga mga katungod. Sa Art. VII, Sek. 1, ginasulti nga mahimong gamiton sa mga pwersa sa US ang kuryente, tubig ug uban pang yutilidad diin ang bayad susama ra sa ginasingil sa gubyerno ng Pilipinas ug walay buwis. Sa parehas usab nga paagi, sa Art. VII, Sek. 2, “gihatagan og awtoridad ang US aron magpadagan og kaugalingong sistema sa telekomunikasyon” ug “ang paggamit sa radio spectrum ihatag libre alang sa US.”
5) Imprastrukturang militar alang sa nagkadaku ug permanenteng presensya
Gipirmahan ang EDCA sa gambalay sa “pagpaling sa Asia” sa US aron pugngan ang paglapad sa gahum sa kaaway nga imperyalistang China. Ilalum sa maong “pagpaling,” gibubu sa US ang 60% sa mga pwersang nabal sa rehiyon. Ang pagdaku sa maong presensya nanginahanglan og dugang nga mga dungguanan, tugpahanan, baraks ug uban pang pasilidad. Ang pagbalik sa mga tropa sa US sa mga kanhing base ug ang pag-abli sa mga bag-ong base kabahin sa maong “pagpaling.”
Instrumento ang EDCA sa pagsalo sa dinaghan ug dinugay nga deployment sa mga tropang Amerikano sa rehiyon, nga nagpabilin sa nasud ilalum sa takuban sa mga war games ug uban pang aktibidad militar. Gawasnong gigamit sa mga sundalong Amerikano ang mga pasilidad sa AFP ug mga “EDCA site” sa maong mga pagbansay nga nagdala og kadaut sa mga Pilipino. Ang maong mga aktibidad ginatakda sa Mutual Defense Board and Security Engagement Board (MDB-SEB).
Niadtong 2018, gitaho sa MDB-SEB ang paglunsad og 261 ka giusang aktibidad sa US ug Pilipinas. Niabot kini og 281 niadtong 2019, nahimong kapin 300 niadtong 2020 ug nagpadayon pa hangtud 2022 nga dili moubos sa 400 ka aktibidad. Kalit kining midaku ngadto sa kapin 500 niadtong 2023 ug gibanabanang mas daku pa karong 2024.
Tin-aw usab nga ginahulagway sa nagkadakung ihap sa mga tumatambong sa Balikatan war games—ang nag-unang war games sa US ug Pilipinas—nga nagpakita sa paglapad sa presensyang militar sa US ug mga alyadong nasud niini dinhi sa Pilipinas. Niadtong 2014, adunay halos 2,500 ka tropang Amerikano ang misalmot sa Balikatan. Miabot kini og 5,000 niadtong 2016 ug gitakda unta ang pagsalmot sa kapin kun kulang 6,500 ka sundalong Amerikano niadtong 2020 apan nakansela ang Balikatan tungod sa pandemya. Bisan atol sa pandemyang Covid-19, nagpadayon gihapon ang Balikatan kung asa mitambong ang 225 ka tropang Amerikano.
Niadtong 2022, kapin 5,100 ka sundalong Amerikano ang misalmot sa pagbansay. Gigamit nila ang 50 ka eroplanong iggugubat, upat ka barkong nabal, 10 ka amphibious craft, upat ka HIMARS rocket system launchers, ug upat ka Patriot missile systems. Misalmot usab dinhi ang 40 ka personel sa Australian Defense Force.
Ang Balikatan 39-24 karong tuiga mao ang pinakadaku sa kasaysayan nga gisalmutan sa kapin 16,000 ka sundalo. Apil niini ang 11,000 ka sundalong Amerikano ug 5,000 ka tropang Pilipino uban ang mga sundalo gikan Australia ug France. Misulod usab ang mga upisyal militar gikan sa 14 pa ka langyawng nasud aron mosalmot ug magsilbing obserber.
Sa unang higayon, gidala sa US ang Balikatan gawas sa teritoryo dagat sa Pilipinas, uban ang pwersang nabal gikan France. Ayha niini, gilunsad sa US ang “makasaysayanong” maniobrang pangdagat uban ang Pilipinas, Australia ug Japan. “Makasaysayanon” usab niining gideploy sa nasud ang bag-ong Typhon Missile System (TMS), nga gilangkuban sa upat ka missile launcher nga adunay kapasidad nga magpalupad og misayl hangtud 1,600 kilometro.
Naglunsad usab og bag-ong mga war games ang US niining milabayng dekada lakip na ang Cope Thunder ug Maritime Cooperative Activity (MCA) sa West Philippine Sea. Duha ka serye sa war games pangkahanginan nga Cope Thunder usab ang gilunsad niini, usa niadtong Abril ug usa niadtong Hulyo.
Mayor nga mga war games sa Enero-Agosto 2024
Gikan sa Enero hangtud Agosto karong tuiga, halos kada duha ka adlaw adunay ginahimong war games ang mga pwersang militar sa US sa kayutaan, kahanginan, ug kadagatan sa Pilipinas. Kauban nila ang mga kaalyadong pwersang militar ug mga itoy niining Armed Forces of the Philippines (AFP). Nahitabo ang maong mga war games sulod sa dili moubos sa 105 hangtud 244 ka adlaw, kung asa ang pinakadugay ug sunsun nahitabo sulod sa 76 ka adlaw (gikan Abril 7 hangtud Hunyo 21). Sa kinatibuk-an, dili moubos sa 21,000 ka tropang Amerikano, mga sundalong Australian, Canadian, Japanese, French ug uban pang mga langyaw tropa ang misalmot.
Daghang mga higayon nga magkadungan ang duha hangtud tulo ka war games sa nasud. Pinaagi niini, permanente nang nakaestasyon ang mga tropang Amerikano dinhi.
Ayha ug human sa mga war games, nagapahigayon og daghang miting, preparasyon ug inspeksyon ang mga langyawng upisyal militar sa lugar sa mga aktibidad. Sa walo ka bulan, halos 20 ka tag-as nga miting ang gihimo sa mga upisyal militar sa US uban ang AFP, Department of National Defense ug Malacañang.
6) Pagsupak sa katawhang Pilipino sa EDCA
Sukad nga gipirmahan ang EDCA, nagpadayon ang mga paningkamot sa mga makinasudnon ug demokratikong organisasyon aron batukan ug ipabasura ang kasabutan. Gikan sa mga ligal nga pakigbisog, mga demonstrasyon, ug internasyunal nga kampanya, nagpadayon hangtud karon ang pagbarog sa katawhang Pilipino batok sa EDCA.
Wala pa mag-usa ka bulan human gipirmahan ang kasabutan, nagpasaka na og mga petisyon sa Korte Suprema ang mga makinasudnong kanhing senador nga sila Rene Saguisag ug Wigberto Tañada uban ang mga lider sa Bagong Alyansang Makabayan (Bayan) ug uban pang mga progresibo niadtong Mayo 26, 2014 aron kwestyunon ang pagka-konstitusyunal sa EDCA. Sila senador Tañada ug Saguisag, uban ang 10 ka senador, miboto niadtong 1991 aron palayason ang baseng militar sa US sa Subic Naval Base sa Zambales ug Clark Air Base sa Pampanga. Aduna pay laing petisyon nga gisang-at sa Korte Suprema batok sa EDCA.
Sa hukum niadtong Enero 12, 2016, gideklara sa Korte Suprema nga konstitusyunal ang EDCA. Nahimong pinal ang desisyon niadtong Hulyo 26, 2016 human napakyas ang motion for reconsideration sa naunang desisyon sa korte.
Taliwala sa maong kapakyasan, nagpadayon gihapon ang mga lihok protesta ug aktibidad nga gipangunahan sa mga grupong nasudnon-demokratiko batok sa EDCA, VFA, ug uban pang mga dili patas nga kasabutang militar sa US sa Pilipinas.
Lakip dinhi ang pagbatok sa mga mangingisda sa mga war games sa kadagatan nga nagdiskaril sa ilang panginabuhian tungod sa pagpahamtang og “fishing ban.” Sa Ilocos, nagpadayag og kabalaka ang lokal nga gubyerno tungod sa paggamit sa ilang lugar nga walay pagpananghid alang sa Balikatan. Gireklamo usab sa mga residente ang paglambigit kanila sa war games isip mga tigbitbit sa kunuhay samarong Amerikano.
Labing bag-o sa paningkamot mao ang gipahigayon nga peace mission sa Bayan-USA ug Pilipinong Nagkakaisa para sa Soberanya (P1NAS) sa Central Luzon, Ilocos Norte, ug Marawi City aron imbestigahan ang mga “EDCA site” ug mga lugar nga gilunsaran sa Balikatan 2024. Gisapubliko sa misyon ang ilang nakaplagan niadtong Hunyo.
Lakip sa mga nadiskubre sa delegasyon ang paghan-uk sa US sa gidudahang gamit-militar gawas sa gitakdang “EDCA site” ug pagpahimulos sa mga rekurso gikan sa masang Cagayanon; pakigkunsabuhay sa mga pribadong kumpanya ug militar; kawalay pagpahibalo ngadto sa mga komunidad sa Ilocos ug Cagayan kung asa gilunsad ang Balikatan nga nagresulta og troma ug kalisang ngadto sa sibilyang populasyon; ug militarisasyon, panggigipit ug Red-tagging ngadto sa mga komunidad nga nagdepensa lamang alang sa ilang kabuhayan. Sa Marawi City, gibaambit sa mga lokal nga upisyal ang disimpormasyon kabahin sa ginatukod nga base militar ug “economic zone” sa palibot niini sa “ground zero” gamit ang pondo gikan sa EDCA.
Ibasura ang EDCA!
Tangtangon ang mga base militar sa US sa Pilipinas!
_____
Giandam sa:
Kawanihan sa Impormasyon
Partido Komunista ng Pilipinas
Nobyembre 2024