Gin-abswelto sang mga korte sa Negros Occidental ang siyam ka aktibista nga gin-aresto sang mga pwersa sang estado sadtong 2019 kag 2022 sa mga kaso nga kriminal. Ginmanduan sang korte ang mga pulis nga hilwayon na ang mga biktima halin sa pila ka tuig nga pagkapriso.
Sadtong Nobyembre 18, ginbasura ang kaso nga pagpatay kag paslaw nga pagpatay batuk kanday Pastor Jimie Teves, Jodito Montesino, Jaypee Romano, Jasper Aguyong, Rogen Sabanal, Eliseo Andres, kag Rodrigo Medez. Ang pito gin-aresto sa Himamaylan City sadtong Hunyo 2019. Gin-imbolbar sila sa isa ka armado nga engkwentro sang BHB kag soldado sang AFP sa Kabankalan City sadtong Mayo 2018.
Sadtong Nobyembre 13, nahilway sanday Carmen Jonahville (CJ) Matarlo kag John Michael Tecson pagkatapos nga ibasura sang korte ang mga kaso nga illegal possession of firearms and explosives batuk sa ila. Gin-aresto ang duha sadtong Marso 18, 2022 kaupod ang konsultant pangkalinong sang National Democratic Front of the Philippines nga si Ramon Patriarca sa Barangay Suay, Himamaylan City.
