Sunod-sunod ang mga kaso sa iligal nga pag-aresto niining bulan sa Disyembre. Wala nakaluwas sa brutal nga pasistang pagpanumpo sa rehimen ni US-Marcos bisan ang mga tigulang ug masakiton.
Sa Iloilo City, giaresto sa mga pwersa sa estado ang 74-anyos nga masakitong si Tomas Dominado ug ang nag-atiman kaniya niadtong Disyembre 5 sa Barangay Sooc, Arevalo, Iloilo City. Giakusahan siya og pagpatay ug rebelyon nga usa na ka dekadang gipasaka sa korte. Gikasuhan usab ang iyang kauban og illegal possession of firearms and ammunition, “terorismo,” ug uban pang kaso nga may kalabutan sa pagtago sa naunang akusado ug obstruction of justice.
Si Dominado nakasinati og stroke niadtong miaging tuig, nakahigda na lamang siya sa katre ug nagsalig lamang sa nag-atiman kaniya aron makalihok gamit ang wheelchair. Aduna siyay altapresyon, heart enlargement, neurological deficits, ug uban pang seryosong isyu medikal ug ang pagpriso kaniya mipagrabe sa iyang kondisyon.
Sa Olongapo City, giaresto sa mga pulis ang usa ka tigulang niadtong Disyembre 7 sa Barangay Gordon Heights sa pasangil nga siya si Prudencio Calubid, usa ka kanhing kumander sa Bagong Hukbong Bayan. Sumala ni Marco Valbuena, upisyal sa impormasyon sa PKP, dili si Calubid ang naaresto kay sukad pa niadtong 2006 siya gidagit ug giwala sa mga ahenteng militar. Ang pag-aresto sa tigulang tin-aw nga pagkubra lamang sa ₱7.8 milyong patong sa ulo ni Calubid.
Sa Quezon, giaresto ang tig-kopra nga si Ronilo Villanueva ug usa pa nga ginganlang “Genero” sa Barangay Guinhalinan, San Narciso niadtong Disyembre 12. Sa wala pa kini, nasamdan sa tiil si Villanueva dihang gipusil siya sa mga sundalo sa 85th IB.
Sa Negros Occidental, giaresto sa giusang pwersang militar ug pulis ubos sa pagpanguna sa 79th IB ang 58-anyos nga si Nanay Melba Gabriel sa Sityo Malig-on, Barangay Bandila, Toboso niadtong Disyembre 14. Giakusahan siya sa mga pwersa sa estado nga “yaweng lider” sa BHB ug gipasakahan og kasong sulayng pagpatay.
Pagdagit. Gitaho bag-o lang sa BHB-Sorsogon ang kaso sa pagdagit ug sekretong pagpriso sa mga pwersa sa estado kang Gerald Gestole (Ka Chris), usa ka manggugubat nga nagpatambal. Gidagit siya niadtong Nobyembre 17, sa alas 4:30 sa hapon sa paradahan sa traysikel sa Barangay Crysanthemum, San Pedro, Laguna.
Pagpamusil. Gipaulanan og bala sa mga sundalo gikan sa 94th IB ang balay sa mag-uumang si Jesse Talaban sa Barangay Buenavista, Himamaylan City niadtong Disyembre 12. Iligal usab nilang gisulod ug giransak ang balay. Wala siya sa iyang balay niadtong tungura.
Pagpanangtang sa Nexperia. Upat ka upisyal gikan sa Nexperia Philippines Inc. Workers’ Union-NAFLU-KMU, lakip na ang ilang presidente, ang gitangtang sa trabaho niadtong Disyembre 17. Ang iligal nga pagtangtang balos sa kapitalista human magpasaka ang mga mamumuo og “notice of strike” niadtong Disyembre 10 human ang usa ka tuig nga pagdelatar sa kumpanya ug deadlock sa negosasyon alang sa bag-ong CBA. Mibotar ang 1,195 ka mamumuo pabor sa welga niadtong Disyembre 20. Matud sa unyon, gigamit sa kapitalista ang akusasyong “pagharang” sa pagsulod-gawas sa mga produkto sa kumpanya aron sila tangtangon.
Demolisyon. Niadtong Disyembre 10, adunay hulga nga demolisyon batok sa 47 ka panimalay sa Dalat, San Roque, Davao City. Matud sa mga residente, naggikan sa upisina ni Atty. Elisio Braganza ang hulga nga pagpalayas kanila. Niining adlawa, miadto ang mga empleyado gikan sa lokal nga gubyerno, partikular gikan sa City Engineering Office, aron mangdemolis.
